Poslovne vijesti - Makedonija

Земјоделците бараат 12 денари за килограм пченица, преработувачите нудат осум

Производителите и преработувачите во понеделник ќе ја договараат откупната цена на пченицата.

Првите бараат најмалку 12 денари, а за вторите оптимална сума е седум до осум денари.

-Ако анализирате со која цена влегува брашното и колкава е цената на лебот, тогаш откупната цена на пченицата би требало да биде седум до осум денари - изјави Благој Стојчев, сопственик на мелница "Стојчев" и претседател на Групацијата мелничари во Стопанската комора.

Земјоделците сметаат дека годинава цената на пченицата не смее да биде под 12 денари.

-Со ова не сакаме мелничарите да пропаднат, ниту да стават клуч на своите капацитети. Едноставно бараме да се спречи увозот на евтино брашно од Србија и од другите 10 земји со кои Македонија во 2003 година склучи договори за слободна трговија - изјави Вељо Тантаров, претседател на Сојузот на земјоделците на Македонија.

Цената на лебот која деновиве дел од преработувачите ја зголемија, за Стојчев е се уште премногу ниска.

-Не може да се зборува за поскапување на лебот, туку за поскапување на инпутите. Увозот на брашно од Србија значително влијае врз цената на лебот и пченицата, но влијанието е многу поголемо кога брашното влегува без дозвола. Бесмислено е брашно да се купува и продава по 10 до 11 денари. Сепак, Законот за земјоделство ќе го регулира сето тоа - рече Стојчев.