Energetika - Makedonija

Грчка компанија за вредност од речиси 1 милијарди евра ќе ја гради хидроцентралата „Чебрен“

Хидроцентралата „Чебрен“, според соопштеното, беше предизвик со години за експертите во енергетиката, архитектурата, градежништвото и предизвик за државата и нејзините фактори задолжени за спроведување на овој голем проект во дело.

„АД ЕСМ и управниот одбор на компанијата се гордеат што во нивни мандат се прави еден сериозен и издржан чекор во правец на реализација на „Чебрен“, државата и АД ЕСМ имаат стручна и секаква друга подготвеност за овој исклучителен инфраструктурен објект да почне да се гради.

Хидроцентралата „Чебрен“ е инвестиција по принципот на јавно-приватно партнерство, во кое ЕСМ ќе биде јавниот партнер во име на државата.

Проценетата вредност на инвестицијата е околу 1 милијарда евра со која е предвидена изградба на реверзибилна хидроцентрала „Чебрен“, со инсталиран капацитет од најмалку 333 MW. ХЦ „Чебрен“ е предвидено да има функција на производство на електрична енергија, како и режим на пумпање и враќање на водата назад, со што на Црна Река предвидено е создавање ново вештачко езеро, кое ќе биде најголемо во нашата држава“, се додава во информацијата.

По завршување на проектирањето и обезбедувањето на потребните документи, се очекува да се почне со градба, која е предвидена да трае 7 години.

„’Чебрен’ е од исклучително значење за енергетската транзиција на Северна Македонија и регионот поради можноста за балансирање на обновливите извори на енергија. Воедно, ќе има огромно значење и за заштита од поплави, водоснабдување, земјоделство и слично со висина на браната од 192 метра, со што ќе биде една од највисоките во светот.

Во контекст на енергетската трансформација и чистите извори на електрична енергија, треба да се каже дека „Чебрен“ ќе ни овозможи во иднина да го намалуваме производството од јаглен и базната енергија постепено да ја супституираме со производството од оваа голема хидроелектрана.

Идејата и проектирањето за големиот хидроенергетскиот проект „Чебрен“ почнува со првите физибилити-студии во 60-тите години. Досега имало 13 неуспешни тендери во последните 20 години. Постојниот јавен повик е четиринаесетти обид за доделување концесија на Црна Река.

Ова е уште еден во низата големи инвестициски проекти во енергетиката. Иако можеби „Чебрен“ е најголем, ние не запираме тука. Продолжуваме“, велат од ЕСМ.