Transport - Makedonija

Од следната година Министерството за транспорт и врски ќе поставува интелигентни транспортни системи на Коридор 10

Со Декларацијата земјите од Западен Балкан се залагаат за воведување на интелигентни системи во железничкиот и патниот сообраќај на европските коридори, како предуслов за ефикасен транспорт.

Министерот Бочварски истакна дека развојот и имплементацијата на Интелигентни транспортни системи се суштински развојот на транспортните мрежи по европски стандарди и нагласи дека патот на Северна Македонија во овој дел е целосно фокусиран на модернизација на Коридорите преку вакви ИТС системи.

На предлог на Министерството за транспорт и врски, Владата ја донесе Националната стратегија за Интелигентни транспортни системи 2023-2032 и во Националната стратегија се наведени целите за нивна имплементација во периодот до 2030 година.

„Првиот квартал од 2024 година очекувам да избереме изведувач и да започнеме со имплементација на ИТС системи долж Коридорот 10 и тоа од Велес до Граничен премин Богородица, а во втора фаза да се постават и од потегот од Велес кон граничниот премин Табановце. Ова вклучува поставување на системи за управување со сообраќајот и тоа знаци со променлива содржина, систем со камери за броење, систем за категоризација на возила, метеоролошки станици за следење на временските услови и регионален контролен центар за ИТС.“ – изјави министерот Бочварски.

Како среднорочна цел предвидена е имплементација на ИТС и на Коридорот 8, како и делницата Тетово – обиколница Скопје – Миладиновци до Штип.

На панелот за ИТС системи во рамките на Министерскиот совет, министерот Бочварски потенцираше дека воведување на вакви информатичко-комуникациски технологии во сообраќајот ќе придонесат за побезбеден, поефикасен и одржлив транспорт.